Нүүр
Хүчингүй эрх зүйн акт 
Хавсралт 
Сонсох / Сонгосон утга сонсох
Pdf
Word
Хэвлэх
МОНГОЛ УЛСЫН ЗАСГИЙН ГАЗРЫН ТОГТООЛ
2012 оны 6 дугаар сарын 25-ны өдөр
Дугаар 218
Улаанбаатар хот
МОНГОЛ УЛСЫН ИРГЭНД ДАВУУ ЭРХИЙН ХУВЬЦАА ЭЗЭМШҮҮЛЭХ ТУХАЙ
Хүний хөгжил сангийн тухай хуулийн 8.4, 8.5-д заасныг үндэслэн Монгол Улсын Засгийн газраас ТОГТООХ нь:
1. "Эрдэнэс МГЛ" ХХК-ийн нэг ширхэг давуу эрхийн хувьцааг хүн ам, өрхийн бүртгэлд бүртгэгдсэн, иргэний харьяаллын зөрчилгүй Монгол Улсын иргэн бүрт үнэ төлбөргүйгээр эзэмшүүлсүгэй.
2. Хувьцаа эзэмших иргэдийн эцэг (эх)-ийн нэр, өөрийн нэр, регистрийн дугаар, хаягийн бүртгэлийн мэдээллийг гэрээний үндсэн дээр "Үнэт цаасны төлбөр тооцоо, төвлөрсөн хадгаламжийн төв" ХХК-д шилжүүлж байхыг Улсын бүртгэлийн ерөнхий газрын дарга Л.Амарсанаад даалгасугай.
3. Жил бүрийн хүн амын өсөлтийг харгалзан "Эрдэнэс МГЛ" ХХК-ийн давуу эрхийн хувьцаа нэмж гаргах асуудлыг тухай бүр зохих журмын дагуу шийдвэрлэж байхыг Төрийн өмчийн хороо (Б.Заяабал), "Эрдэнэс МГЛ" ХХК-ийн Төлөөлөн удирдах зөвлөлд үүрэг болгосугай.
4. "Эрдэнэс МГЛ" ХХК-ийн давуу эрхийн хувьцаа эзэмшигчийн бүртгэлийг хөтлөх ажлыг зохих журмын дагуу зохион байгуулахыг "Эрдэнэс МГЛ" ХХК-ийн гүйцэтгэх захирал Я.Долгоржав, "Үнэт цаасны төлбөр тооцоо, төвлөрсөн хадгаламжийн төв" ХХК-ийн гүйцэтгэх захирал Т.Гандулам нарт үүрэг болгосугай.
5. Улсын бүртгэлийн ерөнхий газрын мэдээллийн нэгдсэн санд шинээр төрсөн болон нас барсан, Монгол Улсын харьяатаас гарсан иргэний мэдээллийг сар бүрийн 25-ны өдрөөр тасалбар болгон дараа сарын 5-ны дотор "Үнэт цаасны төлбөр тооцоо, төвлөрсөн хадгаламжийн төв" ХХК-д хүргүүлж байхыг Улсын бүртгэлийн ерөнхий газрын дарга Л.Амарсанаа, өөрчлөлт орсон мэдээллийн дагуу компанийн давуу эрхийн хувьцаа эзэмшигчдийн бүртгэлд холбогдох өөрчлөлт оруулж байхыг "Үнэт цаасны төлбөр тооцоо, төвлөрсөн хадгаламжийн төв" ХХК-ийн гүйцэтгэх захирал Т.Гандулам нарт тус тус үүрэг болгосугай.
Монгол Улсын Ерөнхий сайд С.БАТБОЛД
Эрдэс баялаг, эрчим хүчний сайд Д.ЗОРИГТ
МОНГОЛ УЛСЫН ЗАСГИЙН ГАЗРЫН ТОГТООЛ
2026 оны 06 сарын 17 өдөр
Дугаар 251
Улаанбаатар хот
"ЭРДЭНЭС МОНГОЛ" НЭГДЛИЙН ШИНЭЧЛЭЛ, БҮТЦИЙН ӨӨРЧЛӨЛТИЙН ТАЛААР АВАХ АРГА ХЭМЖЭЭНИЙ ТУХАЙ
Монгол Улсын Засгийн газрын тухай хуулийн 30 дугаар зүйлийн 1 дэх хэсэг, Үндэсний баялгийн сангийн тухай хуулийн 7 дугаар зүйлийн 7.1.6 дахь заалт, 12 дугаар зүйлийн 12.5 дахь хэсэг, Төрийн болон орон нутгийн өмчийн тухай хуулийн 9 дүгээр зүйлийн 5, 6 дахь хэсэг, Компанийн тухай хуулийн 17 дугаар зүйлийн 17.1 дэх хэсэг, 62 дугаар зүйлийн 62.1.1 дэх заалтыг тус тус үндэслэн Монгол Улсын Засгийн газраас ТОГТООХ нь:
1."Эрдэнэс Монгол" нэгдлийн бүтэц, зохион байгуулалтыг оновчлох, үйл ажиллагааны зардлыг бууруулах, үр ашгийг нэмэгдүүлэх зорилгоор нэгдлийн харьяанд үйл ажиллагаа явуулж байгаа дараах хуулийн этгээдийг хууль тогтоомжид нийцүүлэн доор дурдсан хэлбэрээр өөрчлөн байгуулах, татан буулгах арга хэмжээ авахыг "Эрдэнэс Монгол" ХХК-ийн Төлөөлөн удирдах зөвлөл (Д.Цолмон), гүйцэтгэх захирал Б.Даваадалай нарт даалгасугай:
1.1."Чингис хаан үндэсний баялгийн сан", "Эрдэнэс Метан" хязгаарлагдмал хариуцлагатай компанийг "Эрдэнэс Монгол" хязгаарлагдмал хариуцлагатай компанид тус тус нэгтгэх;
1.2."Хөтөл энержи дулаан" хязгаарлагдмал хариуцлагатай компанийг "Цемент шохой" хязгаарлагдмал хариуцлагатай компанид нэгтгэх;
1.3."Шивээ сервис" хязгаарлагдмал хариуцлагатай компанийг "Шивээ овоо" хувьцаат компанид нэгтгэх;
1.4."Зэс боловсруулах цогцолбор", "Дархан стийл", "Багануур-илч" хязгаарлагдмал хариуцлагатай компанийг тус тус татан буулгах.
2.Нэгдлийн харьяанд үйл ажиллагаа явуулж байгаа хамтарсан хөрөнгө оруулалттай дараах хуулийн этгээдийн хувьцааг шилжүүлэх, эсхүл татан буулгах санал боловсруулж, хууль тогтоомжид нийцүүлэн шаардлагатай арга хэмжээг авч хэрэгжүүлэхийг "Эрдэнэс Монгол" ХХК-ийн Төлөөлөн удирдах зөвлөл (Д.Цолмон), гүйцэтгэх захирал Б.Даваадалай нарт даалгасугай:
2.1."Эрдэнэт ойл" хязгаарлагдмал хариуцлагатай компани;
2.2."Монголын эрдэс баялгийн бирж" хязгаарлагдмал хариуцлагатай компани;
2.3."Эрдэнэс шивээ энержи" хязгаарлагдмал хариуцлагатай компани;
2.4."Шим технолоджи" гадаадын хөрөнгө оруулалттай хязгаарлагдмал хариуцлагатай компани;
2.5."Төв Азийн Уран" гадаадын хөрөнгө оруулалттай хязгаарлагдмал хариуцлагатай компани;
2.6."Гашуун сухайтын төмөр зам" хязгаарлагдмал хариуцлагатай компани;
2.7."Зөөхэрд" хязгаарлагдмал хариуцлагатай компани.
3."Эрдэнэс Монгол" хязгаарлагдмал хариуцлагатай компанийн нэрийг "Чингис хаан баялгийн сан нэгдэл" хязгаарлагдмал хариуцлагатай компани болгон өөрчилж, компанийн дүрмийг хавсралт ёсоор шинэчлэн баталсугай.
4."Чингис хаан баялгийн сан нэгдэл" хязгаарлагдмал хариуцлагатай компанийн дүрмийг улсын бүртгэлд бүртгүүлэхийг компанийн гүйцэтгэх захирал Б.Даваадалайд даалгасугай.
5."Эрдэнэс критикал минералс" төрийн өмчит үйлдвэрийн газрын нэрийг "Монголросцветмет" төрийн өмчит үйлдвэрийн газар болгон өөрчилсүгэй.
6.Энэ тогтоол гарсантай холбогдуулан ""Монголросцветмет" ТӨҮГ-ын талаар авах зарим арга хэмжээний тухай" Засгийн газрын 2025 оны 02 дугаар сарын 19-ний өдрийн 95 дугаар тогтоолын 1 дэх заалтын нэрийг "Эрдэнэс критикал минералс" төрийн өмчит үйлдвэрийн газар гэж өөрчилж, "Эрдэнэс критикал минералс" төрийн өмчит үйлдвэрийн газрын" гэснийг хасаж, 2, 3 дахь заалт, мөн тогтоолын хавсралтаар баталсан "Эрдэнэс критикал минералс" төрийн өмчит үйлдвэрийн газрын дүрмийн гарчиг, мөн дүрмийн 1.1, 1.2, 1.6 дахь заалтын "Эрдэнэс критикал минералс" гэснийг "Монголросцветмет" гэж, 1.5 дахь заалтыг "Үйлдвэрийн газрын оноосон нэр "Монголросцветмет" төрийн өмчит үйлдвэрийн газар, англиар "Mongolrostsvetmet" State-Owned Enterprise болно." гэж тус тус өөрчилсүгэй.
7.Энэ тогтоол гарсантай холбогдуулан "Монгол Улсын иргэнд давуу эрхийн хувьцаа эзэмшүүлэх тухай" Засгийн газрын 2012 оны 06 дугаар сарын 25-ны өдрийн 218 дугаар тогтоол, ""Эрдэнэс Монгол" ХХК-ийн талаар авах зарим арга хэмжээний тухай" Засгийн газрын 2023 оны 03 дугаар сарын 29-ний өдрийн 108 дугаар тогтоолыг тус тус хүчингүй болсонд тооцсугай.
МОНГОЛ УЛСЫН ЕРӨНХИЙ САЙД Н.УЧРАЛ
МОНГОЛ УЛСЫН САЙД, ЗАСГИЙН ГАЗРЫН ХЭРЭГ ЭРХЛЭХ ГАЗРЫН ДАРГА Б.ЭНХБАЯР
