A

A

A

  • Нүүр
  • Засгийн газрын тогтоол
  • “Шинэ бүтээн байгуулалт” дунд хугацааны зорилтот хөтөлбөрийг хэрэгжүүлэх үйл ажиллагааны төлөвлөгөөний тухай
Бүлэг: 1979

ЗАСГИЙН ГАЗРЫН ТОГТООЛ

2010 оны 12 дугаар сарын 29-ний өдөр

Дугаар 343

Улаанбаатар хот

"Шинэ бүтээн байгуулалт" дунд хугацааны зорилтот хөтөлбөрийг хэрэгжүүлэх үйл ажиллагааны төлөвлөгөөний тухай

Улсын Их Хурлын 2010 оны 36 дугаар тогтоол, Монгол Улсын Засгийн газрын 2008-2012 оны үйл ажиллагааны хөтөлбөрийг хэрэгжүүлэх зорилгоор Монгол Улсын Засгийн газраас ТОГТООХ нь:

1. "Шинэ бүтээн байгуулалт" дунд хугацааны зорилтот хөтөлбөрийг хэрэгжүүлэх үйл ажиллагааны төлөвлөгөөг зарчмын хувьд дэмжиж, уг төлөвлөгөөг баталж хэрэгжүүлэхийг Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатар, Зам, тээвэр, барилга, хот байгуулалтын сайд Х.Баттулга, Байгаль орчин, аялал жуулчлалын сайд Л.Гансүх нарт даалгасугай.

2. "Шинэ бүтээн байгуулалт" дунд хугацааны зорилтот хөтөлбөрийг хэрэгжүүлэх ажлыг удирдан зохион байгуулах Үндэсний хорооны бүрэлдэхүүнийг 1 дүгээр хавсралт, хөтөлбөрийг хэрэгжүүлэх ажлыг мэргэжил, арга зүйн удирдамжаар хангах дэд хороодын бүрэлдэхүүнийг 2 дугаар хавсралт ёсоор тус тус баталсугай.

3. "Шинэ бүтээн байгуулалт" дунд хугацааны зорилтот хөтөлбөрийг хэрэгжүүлэхэд шаардагдах хөрөнгийг дараахь эх үүсвэрээс бүрдүүлэх арга хэмжээ авахыг дор дурдсан албан тушаалтанд даалгасугай.

а) улсын төсвийн хөрөнгө оруулалтаар хэрэгжих төсөл, арга хэмжээг ач холбогдлоор нь эрэмбэлж, хэрэгжүүлэхэд шаардагдах хөрөнгийг тухайн жилийн төсвийн багцдаа тусган санхүүжүүлэхийг төсвийн ерөнхийлөн захирагч нарт;

б) улсын төсвийн хөрөнгө оруулалтаар хэрэгжих төсөл, арга хэмжээнээс бусад төсөл, арга хэмжээг хэрэгжүүлэхэд шаардагдах хөрөнгийг уул уурхайн бүтээгдэхүүн нийлүүлэх замаар баталгаа гаргаж эх үүсвэр бүрдүүлэх, гадаадын хөнгөлөлттэй зээл, тусламжид хамруулах, гадаад, дотоодын банк, санхүүгийн байгууллагын хөрөнгөөр санхүүжүүлэх болон баталгаа гаргах аргачлалыг боловсруулж, 2011 оны I улиралд багтаан Засгийн газарт оруулахыг Сангийн сайд С.Баярцогт, Үндэсний хөгжил, шинэтгэлийн хороо (Ч.Хашчулуун), Зам, тээвэр, барилга, хот байгуулалтын сайд Х.Баттулга, Байгаль орчин, аялал жуулчлалын сайд Л.Гансүх, Эрдэс баялаг, эрчим хүчний сайд Д.Зоригт, нийслэлийн Засаг дарга Г.Мөнхбаяр нарт;

в) Улаанбаатар хотын агаарын бохирдлыг бууруулах зорилтын хүрээнд хэрэгжүүлэх ажлын санхүүгийн эх үүсвэрийг гадаадын хөнгөлөлттэй зээл тусламж, цэвэр агаарын сан, байгаль хамгаалах сан болон жил бүрийн төсвийн багцдаа тусган шийдвэрлүүлэх арга хэмжээ авч байхыг Сангийн сайд С.Баярцогт, Байгаль орчин, аялал жуулчлалын сайд Л.Гансүх нарт.

4. Бүтээн байгуулалтын төслүүдийг хэрэгжүүлэхэд шаардагдах үндэсний мэргэжилтэн, инженер техникийн ажилтан болон мэргэжилтэй ажилчдын хэрэгцээг тодорхойлон тэдгээрийг бэлтгэх, гадаадад ажиллаж байгаа мэргэжилтэй ажилчдыг татан оролцуулах талаар зохион байгуулалтын арга хэмжээ авч ажиллахыг Зам, тээвэр, барилга, хот байгуулалтын сайд Х.Баттулга, Нийгмийн хамгаалал, хөдөлмөрийн сайд Т.Ганди, Боловсрол, соёл, шинжлэх ухааны сайд Ё.Отгонбаяр нарт үүрэг болгосугай.

5. Хот төлөвлөлт, барилга байгууламжийн зураг төсөл боловсруулах чиг үүрэг бүхий аж ахуйн тооцоотой "Хот байгуулалт, барилгын зураг төслийн институт" улсын үйлдвэрийн газрыг 2011 оны эхний хагас жилд багтаан байгуулан дүрмийг нь баталж ажиллуулахыг Зам, тээвэр, барилга, хот байгуулалтын сайд Х.Баттулга, Төрийн өмчийн хороо (Д.Сугар)-нд даалгасугай.

6. Орон сууцны нийлүүлэлтийг дэмжиж, инженерийн хангамж, дэд бүтцийн хөрөнгө оруулалтыг зохион байгуулах, захиалагчийн хяналт, инженер техникийн болон мэргэжилтэй ажилтан бэлтгэх, хөтөлбөрт тусгагдсан орон сууцны төсөл, арга хэмжээг зохион байгуулах үүрэг бүхий төслийн менежментийн албыг одоо ажиллаж байгаа Сургалт, судалгаа, хөрөнгө оруулалт, барилга захиалагчийн албаны үйл ажиллагааг өргөтгөх замаар зохион байгуулж ажиллуулахыг Зам, тээвэр, барилга, хот байгуулалтын сайд Х.Баттулгад зөвшөөрсүгэй.

7. Технологийн шинэчлэл хийх замаар Дарханы төмөрлөгийн үйлдвэрийг жилд 500 мянган тонн ган төмөр, бүтээц үйлдвэрлэх хүчин чадалтай болгон өөрчлөх ажлыг зохион байгуулж, түүхий эдийн асуудлыг шийдвэрлэх зорилгоор Төмөртолгойн төмрийн хүдрийн олборлолт, боловсруулалтыг сайжруулан, хүдэр хайлах, төмөр ялган авах технологи нэвтрүүлэх болон шаардлагатай хөрөнгийн эх үүсвэр бүрдүүлэх талаар тодорхой санал боловсруулж Засгийн газарт танилцуулахыг Эрдэс баялаг, эрчим хүчний сайд Д.Зоригт, Төрийн өмчийн хороо /Д.Сугар/ -нд даалгасугай.

8. "Шинэ бүтээн байгуулалт" хөтөлбөрийн хүрээнд баригдах 100 мянган айлын орон сууцны 15-аас доошгүй хувийг дунд болон бага орлоготой иргэдэд зориулан барьж өөрийн өртгөөр нь худалдан борлуулахаар тооцон, барилгын хөрөнгө оруулагч байгууллагуудтай гэрээ байгуулан ажиллахыг Зам, тээвэр, барилга, хот байгуулалтын сайд Х.Баттулга, аймаг, нийслэлийн Засаг дарга нарт үүрэг болгосугай.

9. Иргэдийн орон сууц худалдан авах чадамжийг нэмэгдүүлэх чиглэлээр 2011 онд тодорхой арга хэмжээ авч хэрэгжүүлэхийг Сангийн сайд С.Баярцогт, Нийгмийн хамгаалал, хөдөлмөрийн сайд Т.Ганди, Зам, тээвэр, барилга, хот байгуулалтын сайд Х.Баттулга, Хууль зүй, дотоод хэргийн сайд Ц.Нямдорж нарт даалгасугай.

10. Хөтөлбөрт тусгагдсан орон сууцны хороолол, зам, гүүр, инженерийн шугам сүлжээ, барилга байгууламжийн газрын байршлыг тогтоох, газар олгох, чөлөөлөх, барилга барих зөвшөөрөл олгох ажлыг шуурхай шийдвэрлэж байхыг аймаг, нийслэлийн Засаг дарга нарт үүрэг болгосугай.

11. Хөтөлбөрийн хэрэгжилтийн явц, үр дүнг нэгтгэн жил бүрийн II улиралд багтаан Засгийн газарт танилцуулж байхыг Зам, тээвэр, барилга, хот байгуулалтын сайд Х.Баттулга, Байгаль орчин, аялал жуулчлалын сайд Л.Гансүх, Эрдэс баялаг, эрчим хүчний сайд Д.Зоригт, аймаг, нийслэлийн Засаг дарга нарт даалгасугай.

12. "Шинэ бүтээн байгуулалт" дунд хугацааны зорилтот хөтөлбөрийг хэрэгжүүлэх ажлыг удирдан зохион байгуулах үүрэг бүхий Үндэсний хороо болон дэд хороодын ажиллах журмыг 2011 оны I улиралд багтаан баталж мөрдүүлэхийг хороодын дарга нарт даалгасугай.

13. Засгийн газрын 2010 оны 198 дугаар тогтоолоор баталсан "Төрийн өмчийн концессын зүйлийн жагсаалт"-д дор дурдсан агуулга бүхий Аравдугаар бүлэг нэмсүгэй:

Арав. "Шинэ бүтээн байгуулалт" дунд хугацааны зорилтот хөтөлбөрт тусгагдсан зарим ажлууд

122

Аймгийн төвүүдэд болон нийслэлд барилгын материалын сорил шинжилгээний иж бүрэн лаборатори

Барилгын материалын түүхий эд, бүтээгдэхүүн болон барилга байгууламжийн чанар, аюулгүй байдлын шаардлагын түвшинг дээшлүүлэх

Барих- шилжүүлэх

Лабораторийн иж бүрэн тоног төхөөрөмж, түүний холбогдох тоноглол суурилуулах, тохиргоо хийх, сургалт зохион байгуулах

Судлан шийдвэрлэх

Уралдаант шалгаруу-лалт явуулах

123

1990 оноос өмнө баригдсан нийтийн орон сууцны барилгад 700 лифтийг иж бүрнээр шинэчлэх

1990 оноос өмнө баригдсан нийтийн зориулалттай орон сууцны барилгын лифтийг сайжруулах

Барих-шилжүүлэх

Иж бүрэн тоног төхөөрөмж

Судлан шийдвэрлэх

Уралдаант шалгаруу-лалт явуулах

124

Улаанбаатар хотын зарим дүүргүүдэд Мэргэжил сургалт-үйлдвэрлэлийн төв байгуулах

Улаанбаатар хотод мэргэжилтэй боловсон хүчний нийлүүлэлтийг нэмэгдүүлэх

Зураг төсөл боловсруулах-барих-санхүүжүүлэх-шилжүүлэх

Барилгын зураг төсөл, барилга, иж бүрэн тоног төхөөрөмж

Судлан шийдвэрлэх

Уралдаант шалгаруу-лалт явуулах

14. Энэ тогтоол гарсантай холбогдуулан "Үндэсний хороо байгуулах тухай" Засгийн газрын 2010 оны 3 дугаар сарын 31-ний өдрийн 81 дүгээр тогтоолыг хүчингүй болсонд тооцсугай.

Монгол Улсын Ерөнхий сайд С.БАТБОЛД

Зам, тээвэр, барилга, хот байгуулалтын сайд Х.БАТТУЛГА

Байгаль орчин, аялал жуулчлалын сайд Л.ГАНСҮХ