МОНГОЛ  УЛСЫН  ИХ  ХУРЛЫН ТОГТООЛ

2016 оны 11 сарын 17 өдөр

Дугаар 69

Төрийн ордон, Улаанбаатар хот

Монгол Улсын 2017 оны төсвийн тухай хууль батлагдсантай холбогдуулан авах зарим арга хэмжээний тухай

Монгол Улсын Их Хурлын чуулганы хуралдааны дэгийн тухай хуулийн 25 дугаар зүйлийн 25.17 дахь хэсгийг үндэслэн Монгол Улсын Их Хурлаас ТОГТООХ нь:

1.Монгол Улсын 2017 оны төсвийн тухай хуулийн хэрэгжилтийн явцад хууль, эрх зүйн орчныг сайжруулах, төсвийн орлогыг нэмэгдүүлэх, төсвийн зардлыг хэмнэх, төрийн өмчит болон төрийн өмчийн оролцоотой компаниудын менежментийг сайжруулах талаар дараахь арга хэмжээг авч хэрэгжүүлэхийг Монгол Улсын Засгийн газар /Ж.Эрдэнэбат/-т даалгасугай:

1/Хууль, эрх зүйн орчныг нь сайжруулах чиглэлээр дараахь асуудлыг судалж, саналаа Улсын Их Хуралд өргөн мэдүүлэх:

1.бэлэглэлийн гэрээг ашиглан татвар төлөхөөс зайлсхийхээс урьдчилан сэргийлэх зорилгоор бэлэглэлийн гэрээний бүртгэл болон бүртгэлийн байгууллага, нотариатын байгууллага хоорондын уялдаа холбоог сайжруулах;

2.татварын хөнгөлөлт, чөлөөлөлтийг багасгах боломж;

3.хөрөнгө оруулалтыг нэмэгдүүлэх, хөрөнгө оруулалтын таатай орчныг бүрдүүлэх;

4.төрийн захиргааны төв байгууллагын чиг үүрэгтэй давхацсан үйл ажиллагаа эрхэлдэг Засгийн газрын тусгай сангуудыг татан буулгах;

5.төсвийн шатлал бүрд төсвийн орлого, зарлагыг бодитой тооцох аргачлал бий болгох, төсвийн төслийг боловсруулахад баримтлах зарчмыг оновчтой тогтоох, хэлэлцэн батлах, төсвийн хэрэгжилт, гүйцэтгэлд тавих хяналтыг сайжруулах талаар бодлогын цогц арга хэмжээ авах;

6.орон нутгийн төсвийн суурь зарлагыг тооцох аргачлал, орон нутгийн төсвөөс санхүүжүүлэх үйлчилгээний стандарт, тэдгээрийн орцын болон төсвийн нормативыг хянан үзэж, шинэчлэн батлах.

2/Төсвийн орлого нэмэгдүүлэх чиглэлээр:

1.коксжих нүүрсний экспортын үнийг дэлхийн зах зээлийн үнийн түвшинтэй нийцүүлэх, нэгдсэн нэг үнээр экспортод гаргах бодлогын арга хэмжээг авч хэрэгжүүлэх;

2.түүхий нефтийн экспортоос нөөц ашигласны төлбөрийг тооцож авах, борлуулалтын орлогыг Монгол Улсад бүртгэлтэй арилжааны банкаар дамжуулан гүйцэтгэх хуулийн шаардлагыг бүтээгдэхүүн хуваах гэрээнд тусгах гэрээ хэлцлийг хийж, дүнг Улсын Их Хуралд танилцуулах.

3/Төсвийн зардал хэмнэх чиглэлээр:

1.төрийн албан хаагчдын тоог 2017 оны төсвийн жилд нэмэгдүүлэхгүй байх;

2.Засгийн газрын тусгай сангуудын авлагыг барагдуулах, тусгай сан тус бүрийн хөрөнгийн зарцуулалтын үр өгөөжийг тооцох, Жижиг, дунд үйлдвэрийг хөгжүүлэх сан, Хөдөлмөр эрхлэлтийг дэмжих сан, Тариаланг дэмжих сангийн хөрөнгийн бодит өгөөж, ажлын байр нэмэгдүүлсэн байдал, үйлдвэрлэлийг нэмэгдүүлж, бүтээгдэхүүний тоо хэмжээ, экспортод үзүүлсэн үр дүн, нөлөөллийн талаар судалгаа хийж, дүнг Төсвийн зарлагын хяналтын дэд хороонд танилцуулах;

3.гадаад зээллэгийн хөрөнгийг дотоодод дамжуулан зээлдүүлсэн зээл тус бүрийг үнэлэх, мөн зориулалтын бусаар ашигласан, хугацаа хэтэрсэн зэрэг зөрчилтэй зээлүүдийг эргэн төлүүлж, үүссэн авлагыг барагдуулах;

4/Төрийн өмчит болон төрийн өмчийн оролцоотой компанийн менежментийг сайжруулах чиглэлээр:

1.улсын төсөвт төвлөрүүлэх ногдол ашгийн орлогыг нэмэгдүүлэх;

2.2015 оны жилийн эцсийн санхүүгийн тайлангаар баталгаажсан 10.8 их наяд төгрөгийн өглөгийг бууруулах;

3.төрийн өмчит болон төрийн өмчийн оролцоотой компанийн зардлыг багасгах, тэдгээрт ажиллагсдын тоог бууруулан 2012 оны түвшинд хүргэх;

4.төлөөлөн удирдах зөвлөлийн бүрэлдэхүүнд тухайн салбарын асуудал эрхэлсэн төрийн захиргааны байгууллагын төлөөлөл голлон ордог зарчимд шилжих;

5.төлөөлөн удирдах зөвлөлийн гишүүд, удирдлагын цалин, урамшууллыг оновчтой тогтоох.

2.Энэ тогтоолын хэрэгжилтэд хяналт тавьж ажиллахыг Монгол Улсын Их Хурлын Төсвийн байнгын хороо /Ч.Хүрэлбаатар/-нд, тогтоолын 1.3.2 дахь дэд заалтад хяналт тавьж ажиллахыг Төсвийн зарлагын хяналтын дэд хороо /З.Нарантуяа/-нд тус тус үүрэг болгосугай.

3.Энэ тогтоолыг 2017 оны 01 дүгээр сарын 01-ний өдрөөс эхлэн дагаж мөрдсүгэй.

МОНГОЛ УЛСЫН ИХ ХУРЛЫН ДАРГА М.ЭНХБОЛД