МОНГОЛ  УЛСЫН  ИХ  ХУРЛЫН ТОГТООЛ

2014 оны 04 дүгээр сарын 17-ны өдөр

Дугаар 30

Улаанбаатар хот

Монгол Улсын Засгийн газарт чиглэл өгөх тухай

Монгол Улсын Их Хурлын тухай хуулийн 43 дугаар зүйлийн 43.1 дэх хэсгийг үндэслэн ТОГТООХ НЬ:

1.Монгол Улсын Их Хурлын 2013 оны 63 дугаар тогтоолын дагуу Монгол Улсын 2014 оны төсвийн тухай хуульд "0.0" дүнтэй тусгагдсан төсөл, арга хэмжээний төсөвт өртөг нэмэгдсэн, гүйцэтгэл удааширсан шалтгааныг тогтоох, гүйцэтгэл хэрэгжилтийн явц байдалд хийсэн Үндэсний аудитын газрын тайланг хэлэлцээд дараах арга хэмжээг авч хэрэгжүүлэхийг Монгол Улсын Засгийн газар /Н.Алтанхуяг/-т даалгасугай:

1/Монгол Улсын төсвийн хөрөнгөөр 2014 онд санхүүжүүлэх хөрөнгө оруулалтын төсөл, арга хэмжээ, барилга байгууламжийн жагсаалтад "0.0" дүнтэй тусгагдсан төсөл, арга хэмжээ, барилга байгууламжаас 2014 оны төсвийн жилд санхүүжүүлэх төсөл, арга хэмжээ, барилга байгууламжийн жагсаалтыг 1 дүгээр хавсралтад тусгагдсанаар, Хөгжлийн банкны санхүүжилтээр санхүүжүүлэх төсөл, арга хэмжээ, барилга байгууламжийн жагсаалтыг 4 дүгээр хавсралтыг үндэслэн, Монгол Улсын 2014 оны төсвийн тодотголын төслийг энэ тогтоолын хүрээнд боловсруулан, тогтоол хүчин төгөлдөр болсон өдрөөс хойш ажлын 5 өдрийн дотор Улсын Их Хуралд өргөн мэдүүлэх;

2/Монгол Улсын 2014 оны төсвийн бараа, үйлчилгээний зарим зардлыг 10-30 хувиар бууруулж, хэмнэлттэй ажиллах боломжийг судлан, саналаа Монгол Улсын 2014 оны төсвийн тодотголын төсөлд тусгах;

3/ажил нь бүрэн дууссан төсөл, арга хэмжээ, барилга байгууламжийн жагсаалтыг 2 дугаар хавсралтад тусгагдсанаар тооцох, цаашид улсын төсвөөс санхүүжилт олгох шаардлагагүй гэж аудитын байгууллага дүгнэсэн төсөл, арга хэмжээ, барилга байгууламжийг 3 дугаар хавсралтад тусгагдсанаар судалж, зориулалтын дагуу үргэлжлүүлэх эсэхийг шийдвэрлэх, үргэлжлүүлэх шаардлагагүй нөхцөлд улсын төсвөөс зарцуулсан хөрөнгийг нөхөн бүрдүүлэх арга хэмжээ авах;

4/энэ тогтоолын 5 дугаар хавсралтад тусгагдсан төсөл, арга хэмжээ, барилга байгууламжийг 2015 онд улсын төсвөөс санхүүжүүлэхээр тооцож, Монгол Улсын 2015 оны төсвийн тухай хуулийн төсөлд тусгах;

5/төрийн болон орон нутгийн өмчийн хөрөнгөөр бараа, ажил, үйлчилгээ нийлүүлэх болон гүйцэтгэхээр байгуулсан гэрээний үүргээ биелүүлээгүй аж ахуйн нэгжүүдийн зөрчлийг хянан үзэж, тендерт оролцох эрхээ хязгаарлуулсан этгээдийн бүртгэлд хуульд заасны дагуу хамруулж, жагсаалтыг олон нийтэд зарлах;

6/төсөвт өртгийг үндэслэлгүйгээр нэмэгдүүлэхэд нөлөөлсөн Зам, тээвэр, барилга, хот байгуулалтын сайдын 2012 оны 18, 181 дүгээр тушаалыг хүчингүй болгох арга хэмжээ авах, барилгын норм, нормативын баримт бичгийг батлахтай холбоотой Барилгын тухай хуулийн холбогдох заалтыг өөрчлөх талаар хуулийн төсөл боловсруулж, Улсын Их Хуралд өргөн мэдүүлэх;

7/хөрөнгө оруулалтын төсөл, арга хэмжээ, барилга байгууламжийн төсөвт өртгийн тооцооллыг алдаатай боловсруулсан 6 дугаар хавсралтад нэр нь дурдагдсан төсөвчдөд холбогдох хууль тогтоомжид заасны дагуу хариуцлага тооцох;

8/төрийн байгууллагуудын хөрөнгө оруулалт хариуцсан ажилтнуудын мэргэжлийн ур чадварыг дээшлүүлэх хөтөлбөр хэрэгжүүлэх, давтан сургалтад хамруулах;

9/улсын төсвийн хөрөнгөөр санхүүжүүлэхээр өмнөх онуудын төсвийн тухай хуульд тусгагдан хэрэгжиж эхэлсэн боловч үлдэгдэл санхүүжилт нь Монгол Улсын 2014 оны төсвийн тухай хуульд тусгагдаагүй орхигдсон төсөл, арга хэмжээ, барилга байгууламжийг цаашид хэрхэн санхүүжүүлэх саналаа боловсруулж ирүүлэх;

10/хөрөнгө оруулалтын төсөл, арга хэмжээний худалдан авах ажиллагааг буруу зохион байгуулж, ажлын гүйцэтгэл, хэрэгжилтэд тавих хяналтыг сулруулж, хариуцлагагүй хандсан төсвийн захирагч, төсвийн байгууллагын удирдлага, төрийн албан хаагчид хариуцлага тооцох;

11/Үндэсний аудитын газрын тайлангийн дүгнэлт хэсэгт дурдсаныг үндэслэн нийслэлийн 3 дугаар төрөх эмнэлгийн барилгын ажлын үлдэгдэл санхүүжилтийг Монгол улсын 2014 оны төсвийн тодотголын төсөлд тусгах арга хэмжээ авах;

12/нийслэлд болон нийслэлийн ойролцоо байрлалтай Шүүхийн шийдвэр гүйцэтгэх ерөнхий газрын харьяа хорих ангийн барилга байгууламж, Архивын ерөнхий газрын 2 дугаар байр, Хууль зүйн яамны байр, шүүх, прокурорын барилга байгууламжийг тэдгээрийн тус тусын эзэмшил газрын хамт зохих хууль тогтоомжийн хүрээнд худалдан борлуулах замаар орлого бүрдүүлэн, уг орлогоос нэгдсэн хорих, шүүх, прокурорын байгууллагын цогцолбор, архивын шинэ байр болон хууль зүйн салбарын үйлчилгээг төвлөрүүлэх барилга байгууламжид хөрөнгө оруулалт хийх ажлыг зохион байгуулах;

13/Улсын Их Хурлын 2012 оны 60 дугаар тогтоолын дагуу дунд хугацаанд хэрэгжих улсын хөрөнгө оруулалтын хөтөлбөрийг боловсруулан, холбогдох хуулийн төслийн хамт Улсын Их Хуралд өргөн мэдүүлэх;

14/хөрөнгө оруулалтыг үр дүнд суурилж төлөвлөх, техник, эдийн засгийн үндэслэл, зураг төсвийг боловсруулах, хянаж баталгаажуулах, техникийн нөхцөлийг хангах, гүйцэтгэгчийг сонгон шалгаруулах, барилга байгууламжийг барьж ашиглалтад оруулах, гүйцэтгэлийг хянах, санхүүжилт олгох зэрэг хөрөнгө оруулалтыг хэрэгжүүлэх бүх үе шатны тогтолцоог сайжруулах талаар санал боловсруулах.

2.Монгол Улсын 2014 оны төсвийн тухай хуульд "0.0" дүнтэй тусгагдсан хөрөнгө оруулалтын төсөл, арга хэмжээ, барилга байгууламжийн жагсаалтаас 2014 онд санхүүжүүлэх хөрөнгө оруулалтын төсөл, арга хэмжээ, барилга байгууламжийн жагсаалтыг 1 дүгээр хавсралтаар, ажил нь бүрэн дууссан төсөл, арга хэмжээ, барилга байгууламжийн жагсаалтыг 2 дугаар хавсралтаар, цаашид зориулалтын дагуу үргэлжлүүлэх эсэхийг Засгийн газар шийдвэрлэх төсөл, арга хэмжээ, барилга байгууламжийн жагсаалтыг 3 дугаар хавсралтаар, Хөгжлийн банкны санхүүжилтээр санхүүжүүлэх төсөл, арга хэмжээ, барилга байгууламжийн жагсаалтыг 4 дүгээр хавсралтаар, 2015 онд санхүүжүүлэх төсөл, арга хэмжээ, барилга байгууламжийн жагсаалтыг 5 дугаар хавсралтаар, хөрөнгө оруулалтын төсөл, арга хэмжээ, барилга байгууламжийн төсөвт өртгийн тооцооллыг алдаатай боловсруулсан төсөвчдийн нэрсийг 6 дугаар хавсралтаар тус тус Монгол Улсын Засгийн газар /Н.Алтанхуяг/-т хүргүүлсүгэй.

3.Энэ тогтоолын хэрэгжилтэд хяналт тавьж ажиллахыг Төсвийн байнгын хороо /Ц.Даваасүрэн/-нд, хэрэгжилтийн явцыг Улсын Их Хурлын 2014 оны хаврын ээлжит чуулганы завсарлагааны хугацаанд Төсвийн байнгын хорооны хуралдаанд танилцуулахыг Монгол Улсын Засгийн газар /Н.Алтанхуяг/-т тус тус даалгасугай.

4.Энэ тогтоолыг 2014 оны 4 дүгээр сарын 17-ны өдрөөс эхлэн дагаж мөрдсүгэй.

МОНГОЛ УЛСЫН

ИХ ХУРЛЫН ДАРГА З.ЭНХБОЛД