Эрх зүйн акт
Мэдээ
Сургалт
Мэдлэгийн сан
Байгууллага
Ном
Эрх зүйн хөтөч бэлтгэх сургалтыг Сэлэнгэ аймагт амжилттай зохион байгууллаа
2019.12.09
“Бүх нийтийн эрх зүйн боловсролыг дээшлүүлэх үндэсний хөтөлбөр”-ийг 3.2.1-т эрх зүйн хөтөчийн тогтолцоо бий болгох; 3.2.6-д төрийн болон төрийн бус байгууллагууд өөрийн эрхлэх асуудлын хүрээнд мэргэшсэн эрх зүйн хөтөч ажиллуулах. 6.4.3-т эрх зүйн хөтөч бэлтгэх, чадавхыг нь тасралтгүй бэхжүүлэх талаар заасан. Хөтөлбөрийн дээрх зорилтыг хэрэгжүүлэх ажлын хүрээнд Хууль зүйн үндэсний хүрээлэнгээс эрх зүйн хөтөч бэлтгэх ажлыг нийслэл болон орон нутагт зохион байгуулж эхлээд байна. Энэ дагуу эрх зүйн хөтөч бэлтгэх сургалтын XIV ээлжийн сургалтыг Нээлттэй нийгэм форум, Сэлэнгэ аймгийн Засаг даргын Тамгын газартай хамтран амжилттай зохион байгууллаа. Сургалтад Сэлэнгэ аймгийн эрх зүйн хөтчөөр ажиллаж буй иргэд, сум, тосгодын Засаг даргын Тамгын газрын Төрийн захиргаа, Хууль, эрх зүйн асуудал хариуцсан мэргэжилтэн, нийгмийн бодлого хариуцсан мэргэжилтэн, Насан туршийн боловсролын төвийн багш, ЕБС-ийн нийгмийн ажилтан зэрэг ажил, мэргэжлийн 58 албан хаагч хамрагдлаа.
Тус сургалтыг хөтөлбөрийн дагуу Хууль зүйн үндэсний хүрээлэнгийн ХЗСМСТ-ийн дарга А.Түвшинтулга, Удирдлагын академийн багш, хууль зүйн доктор, дэд профессор А.Алтанзул, Нийслэлийн иргэний хэргийн давж заалдах шатны шүүхийн шүүгч М.Наранцэцэг, Монголын хуульчдын холбооны мэргэжлийн хариуцлагын хорооны, сахилгын ахлах шинжээч шинжээч, Б.Эрдэнэбилэг, Монголын хуульчдын холбооны гишүүн, хуульч, хууль зүйн доктор Б.Гүнбилэг, Монголын хуульчдын холбооны гишүүн, өмгөөлөгч В.Энхтамир, Отгонтэнгэр их сургуулийн Иргэний эрх зүйн тэнхимийн багш Б.Мөнхзаяа нар хичээл заав.
Сургалтын хаалтад Хууль зүйн үндэсний хүрээлэнгийн захирал С.Энхцэцэг, Хууль зүйн үндэсний хүрээлэнгийн ХЗСМСТ-ийн дарга А.Түвшинтулга, Сэлэнгэ аймгийн Тамгын газрын Хууль, эрх зүйн хэлтсийн дарга Д.Ёндонжамц, Нээлттэй нийгэм форумын зохицуулагч П.Бадамрагчаа, Монголын хуульчдын холбооны гишүүн, хуульч, хууль зүйн доктор Б.Гүнбилэг нар оролцлож “Эрх зүйн хөтөч” бэлтгэх сургалтад хамрагдсан 55 иргэнд гэрчилгээ гардууллаа.
