ЗАСГИЙН ГАЗРЫН ТОГТООЛ

ЭМЭГТЭЙЧҮҮДИЙН АСУУДЛААРХИ ДЭЛХИЙН IҮ БАГА ХУРАЛД БЭЛТГЭХ АЖЛЫГ ЭРЧИМЖҮҮЛЭХ ТУХАЙ

1995 оны 5 дугаар сарын 10-ны өдөр

Улаанбаатар хот

Дугаар 68

Монгол Улсын Засгийн газраас ТОГТООХ нь :

1.Эмэгтэйчүүдийн асуудлаархи дэлхийн IҮ бага хурлын бэлтгэлийг хангах Үндэсний хороог хавсралтад дурдсан бүрэлдэхүүнтэйгээр байгуулж ажиллуулсугай.

2.Үндэсний хороо (Э.ГОМБОЖАВ)-д даалгах нь:

а)дэлхийн IҮ бага хуралд оролцох бэлтгэлийг хангахын зэрэгцээ эмэгтэйчүүдийн аж байдлыг сайжруулах талаар 2000 он хүртэл баримтлах үйл ажиллагааны үндсэн чиглэлийг тодорхойлох зорилгоор "Эмэгтэйчүүд-нийгмийн хөгжил" сэдэвт үндэсний чуулганыг зохих бэлтгэлийг нь хангасны үндсэн дээр 1996 оны 1 дүгээр улиралд Улаанбаатар хотноо зохион байгуулж хийлгэсүгэй;

б)эмэгтэйчүүдийн эрх ашгийг хамгаалах 10 сарын ажлыг "Эх, үрсийн өдөр" 6 дугаар сарын 1-нээс эхлэн улс орон даяар зохион байгуулж, энэ ажилд төрийн захиргааны төв болон нутгийн захиргааны байгууллагыг тодорхой үүрэгтэйгээр оролцуулж, тэдний зохиож байгаа ажилд хяналт тавьж, явцыг Засгийн газарт танилцуулж ажилласугай;

в)бага хурал, чуулганы бэлтгэлийг хангах болон эмэгтэйчүүдийн эрх ашгийг хамгаалах 10 сарын ажлыг зохион байгуулахдаа олон нийтийн байгууллага, аж ахуйн нэгж, ажил хэрэгч хүмүүс, эмэгтэйчүүдийг өргөн оролцуулж, тэдний санаачилгыг дэмжин тэдэнтэй идэвхтэй хамтран ажилласугай.

З.Аймаг, нийслэлийн Засаг дарга нарт даалгах нь:

а)нутаг дэвсгэрийнхээ эмэгтэйчүүдийн амьдрал ахуй, нийгмийн байдалд үнэлэлт дүгнэлт өгч, эмэгтэйчүүдийн аж байдлыг сайжруулах, тэдний нийгмийн идэвхийг өрнүүлэх талаар баримтлах бодлого, чиглэл гарган, түүний дагуу авах тодорхой арга хэмжээг "Эмэгтэйчүүдийн эрх ашгийг хамгаалах 10 сарын ажил"-ын хүрээнд авч хэрэгжүүлсүгэй;

б)удирдах, шийдвэр гаргах бүх шатанд эмэгтэйчүүдийн эзлэх байр суурийг дээшлүүлэх, хөдөөгийн

эмэгтэйчүүдийн эрүүл мэндийг хамгаалах, тэдгээрийг албан бус сургалтад өргөнөөр хамруулах нөхцөлийг бүрдүүлэх ажил зохион байгуулсугай;

в)эмэгтэйчүүдэд орлогоо нэмэгдүүлэх, хөдөлмөр эрхлэхэд нь бодитой туслалцаа үзүүлж, өрх толгойлсон, олон хүүхэдтэй, амьжиргааны түвшин доогуур байгаа эмэгтэйчүүдийг эн тэргүүнд анхааран эмэгтэйчүүдэд зориулсан ажлын байр бий болгосон аж ахуйн нэгжүүдийг дэмжиж ажилласугай.

4.Эхчүүд, эмэгтэйчүүдийг хүндэтгэх, тэдний эрхийг хангах, амьдрал ахуй, хөдөлмөрийн нөхцөлийг нь сайжруулах талаар санаачилга гаргаж ажиллахыг аж ахуйн нэгж, байгууллагуудын эрх баригчдад уриалсугай.

5.Эмэгтэйчүүдийн асуудлаархи дэлхийн IҮ бага хурал, Эмэгтэйчүүдийн эрх ашгийг хамгаалах 10 сарын ажил болон Үндэсний чуулганы бэлтгэл ажлын талаар олон нийтэд өргөн сурталчлахыг Радио, телевизийн хэрэг эрхлэх газар (Б.ӨВГӨНХҮҮ), "Засгийн газрын мэдээ" сонины газар (Х.ЦЭВЛЭЭ)-т даалгасугай.

6.Үндэсний чуулган зохион байгуулахад шаардагдах зардлыг тооцож 1996 оны төсөвт тусгах асуудлыг хянаж шийдвэрлэхийг Хүн амын бодлого, хөдөлмөрийн яам (Э.ГОМБОЖАВ), Сангийн яам (Э.БЯМБАЖАВ)-д даалгасугай.

Монгол Улсын Ерөнхий сайд П.ЖАСРАЙ

Хүн амын бодлого, хөдөлмөрийн сайд Э.ГОМБОЖАВ